滕麗名首入圍金像獎女配　入圍喜訊靠舊同事先通知.第44屆香港電影金像獎入圍名單出爐！憑電影版《尋秦記》首度入圍「最佳女配角」的滕麗名，成為今屆賽事的超大驚喜。向來以TVB劇集為觀眾熟知的佢，鮮少拍攝電影就成功叩關金像獎，受訪時更搞笑否認入圍消息由監製古天樂通知，直言「古生冇我電話㗎」，灑脫表示入圍已經當贏，態度相當圈粉。

第44屆香港電影金像獎入圍名單正式公布，向來憑《愛．回家之開心速遞》等TVB劇集深入民心的滕麗名，憑古天樂監製的電影版《尋秦記》，首度獲得「最佳女配角」提名，成為今屆金像獎的一大亮點。過去15年滕麗名鮮少參與電影拍攝，今次跨界出演就成功入圍，將會對撼鮑起靜、衛詩雅、惠英紅、鄧濤等實力派對手，角逐最終獎項。

3月3日滕麗名現身電視城，出席《愛．回家之開心速遞》宣傳造勢活動，接受訪問時坦言心情相當開心，亦十分感動：「第一次憑離開TVB嘅作品獲得提名，本身拍電影嘅機會就唔多，今次可以入圍，真係好感觸。」

講到收到入圍喜訊的經過，滕麗名笑指，第一個通知消息的，係一班已經離開TVB的舊同事，大家都好戥佢開心。被問到係唔係電影監製古天樂親自通知，佢即刻連連否認，大笑回應：「唔係唔係，古生冇我電話㗎！」講到老公有冇送上鼓勵說話，佢就搞笑爆料：「佢叫我多謝佢喎，但我唔會囉！」距離4月的頒獎禮尚有一段時間，被問到會不會心心念念獎項，滕麗名就相當灑脫：「我唔會啊，其實喺我心目中已經當攞咗，因為其他對手都好強，所以我覺得入圍已經係贏咗啦。」

至於頒獎禮當晚的「戰衣」，滕麗名就透露已經在籌備當中，直言：「造型方面，一睇我個樣就知我唔係行性感路線，我希望行型格風。」被問到會唔會俾老公過目給意見，佢就笑指完全唔使：「因為我嘅尺度比佢細，可能我覺得好暴露嘅造型，佢已經覺得好保守。」TVB