游嘉欣落選《魔音女團》16強未受影響 跳熱舞騷弗爆Body 高EQ回應醫美質疑.現年26歲嘅游嘉欣近年獲TVB力捧，憑清純形象成功入屋，最近參加《魔音女團》雖然被視為熱門人選，但日前公布16強名單時，佢同另一大熱郭柏妍雙雙落選，令大批網民大跌眼鏡，甚至話要「罷睇」抗議。不過游嘉欣似乎心情未受影響，晚上喺社交平台派福利，以行動安慰粉絲。

游嘉欣喺IG分享一條喺健身房跳舞嘅片，寫道：「等到無人嘅一刻，決定每日照鏡都要讚美下自己，因為自信的女生最棒了」。片中佢身穿米白色貼身露腰背心配黑色運動短褲，挑戰熱門網紅舞，一臉自信對住鏡頭展示手臂肌肉線條，狂扭纖細蛇腰，腹肌若隱若現，加埋一對「蜜大腿」，吸睛度爆燈，睇得出佢成功減走Baby Fat，全身線條變得更突出。

影片引嚟圈中好友紛紛留言，陳懿德大讚：「我都要讚！好正」；陳嘉慧都忍唔住話：「小蠻腰啊」。唔少網民亦留言盛讚佢Perfect Body：「果然瘦的女仔最好命！最有自信」、「好瘦～～好靚～～～」、「越來越漂亮」。由於外型Fit爆，加上外貌愈見精緻，有網民質疑「真係勁似AI」，游嘉欣幽默回覆：「我就當係讚美啦」；有酸民追擊佢「過分醫美」，游嘉欣大方回覆：「呢個程度未到醫美發力」，盡現高EQ一面。TVB 有網民就「錯重點」，坦白話原本鍾意游嘉欣係因為有身材，𠵱家瘦身連上圍都細埋：「怎麼感覺瘦到胸也小了」。對此，游嘉欣怕醜回覆：「有啲咁嘅事？身形美感，最緊要比例。試吓鍾意吓我其他亮點」，佢透露𠵱家每次做Gym約一小時，一星期去一至兩次，再加其他運動，有時打網球或者行樓梯機。有網民讚佢犀利：「不怪的你保養的那麽好！」

對於未能晉身《魔音女團》16強，有粉絲留言安慰：「游游沒進到魔音女團其中哪16位實習生的名單，心情還好嗎？別哭哭！你跳的好好看，你的ootd for everyday 好好看」。游嘉欣表現豁達：「沒事，突破了不敢唱歌的心理關口。」並配上火焰表情符號，顯示雖然比賽止步，但已戰勝自我，心情似乎完全不受影響。