金像影后余香凝加盟《哪吒2》粵語版 台詞升級注入港式靈魂.Now爆谷台推出《哪吒之魔童鬧海》（《哪吒2》）全新粵語配音版，定於4月11日強勢上架。新版注入更貼地、更「啜核」嘅粵語對白，帶領觀眾以最親切嘅語言，再次投入哪吒與敖丙嘅奇幻世界。粵語版除咗保留上集原班聲優，今次仲力邀三位星級演員加盟——金像獎影后余香凝聲演殷夫人、金像獎最佳女配角廖子妤聲演鶴童及西海龍王，以及入圍今屆金像獎最佳男配角嘅陳湛文聲演無量仙翁。三人以港式幽默與生活化語調，演繹製作團隊精心調整嘅「地道」對白，成功將原本熱血嘅故事轉Channel，昇華為充滿親切感嘅「港式熱血」。

余香凝早前接受專訪時表示，配音過程比想像中順利。面對角色擁有唔同情緒轉變，集可愛、剛強、虛弱及母性大爆發於一身，佢直言：「今次呢個配音，應該係我最多面、最多樣化嘅角色。」廖子妤需同時分飾鶴童及西海龍王敖閏兩角，佢話希望盡力做到兩把聲音有唔同分別。陳湛文就笑言：「由細到大都幾鍾意用聲音扮演老人家，即使要長時間壓沉聲線去演老人家比較耗力，但成個過程十分享受、好玩。」

《哪吒2》作為2019年《哪吒之魔童降世》嘅續作，於2025年農曆年間上映後勢如破竹，截至2025年6月30日，全球票房勁收逾159億元人民幣，榮登2025年全球票房榜冠軍，更擊敗《長津湖》成為中國影史票房冠軍，並躋身全球影史票房榜第五位，成績斐然。