許紹雄女兒許惠菁春茗向Bob求姻緣惹婚變疑雲 社交網已清空婚照僅留全家福.林盛斌（阿Bob）呢日率領旗下主持團隊舉行春茗，除了正式介紹王海榛、劉晨芝、應昌佑等新加盟成員，席間最大焦點莫過於許紹雄的已婚女兒許惠菁（Charmaine）——竟同兩位單身新成員一齊向有「金牌媒人」之稱的阿Bob求姻緣，更公開擇偶條件要心地善良兼孝順，隨即惹來外界熱議其婚姻狀況。

事後許惠菁受訪時就解釋，當日只係配合現場大家的氣氛，笑言「無論如何都要幫襯阿Bob」，並非真的求介紹對象。她又提到，當日見到應昌佑聽到王海榛同劉晨芝講擇偶條件時，全程擰晒頭的表情相當有趣，自己十分欣賞。被問到是否現時以事業為重、同先生少見面，許惠菁就迴避直接回應婚姻狀況，只表示而家大部分時間都陪住屋企人，包括媽媽、公公婆婆，自己成了家人的情緒支柱，目前專心發展事業，同丈夫各有各忙，覺得最好就係日日有工開。

事實上，許惠菁於2023年底同拍拖7年的新加坡男友拉埋天窗，當時婚宴獲大批圈中好友到賀，場面相當熱鬧。不過TVB娛樂新聞台就發現，許惠菁已經將社交平台上的結婚相悉數清空，僅剩低全家福，進一步加劇了外界的婚變疑雲。

至於同場新加盟的應昌佑，阿Bob受訪時就親自講解邀請佢加盟的緣由。阿Bob指同應昌佑（Charles）相識多年，無論對方當年做歌手、做DJ，大家這麼多年一直都有聯繫；近兩三年應昌佑收埋了自己，無論家庭定個人方面都有好多新動向同改變，於是自己主動問佢有冇興趣出嚟做主持人。阿Bob亦坦言，唔係話要突然捧紅佢，或者叫佢翻去做歌手，只係知道佢對運動非常熱衷，無論籃球、睇波賽，所有運動相關的事都相當熟悉，「我個樣就明顯唔係好運動型，日後接到呢類工作就可以搵佢試，畀多啲工作機會佢」。

向來關心旗下藝人發展的阿Bob，不時都會給予團隊成員寶貴意見，提升大家的技能，令團隊更具競爭力。除了主持本職，阿Bob仲提議訓練旗下藝人王鎮泉練唱歌，大讚王鎮泉唱歌水準OK：「做主持好多時都有機會要唱兩首歌搞氣氛，只要唔太離譜、唔太難聽，都可以練多啲，擴闊自己的工作範疇。」

TVB