藝人陳展鵬和太太單文柔是圈中的「廿四孝爸媽」，暑假來臨，兩人已為寶貝女「小豬比」籌備連串活動，除早前一家三口到越南旅遊，回港後又為女兒安排好暑假營、賣旗、AI課程、攀石、體操及學游水。單文柔表示女兒遺傳了爸爸基因：「精力旺盛，要安排大量活動畀佢放電。」展鵬和應說：「個女放電，我哋先有覺好瞓。」

展鵬透露工作同樣忙，除新劇快開拍外，近兩年主力發展音樂發展，將到越南登台，再到馬來西亞工作，笑指現自資做音樂，在宣傳上很方便，只要有手機便可以，不用如以前般要安排跑電台，但因以Live騷為主，所以要努力練歌。又感激太太做背後的女人，除了為她主理家中事務，更任幕後功臣。

談及編劇監製鄧特希和前亞姐呂晶晶意外被爆夫婦關係，有指展鵬曾和呂晶晶發展地下情。展鵬澄清和呂晶晶全沒有關係：「唔知點解會拉埋我個名字入去，當然冇呢件事，會唔會有咗我個名就多啲關注，我完全覺得好奇怪，完全同佢唔熟，只係同一公司，一直冇合作過，可能亞姐活動我坐喺台下啫。（點解傳緋聞？）好勁，係太太畀我睇報道，佢話又關我事。我依家係TVB嘅人，唔通我係某電視台代表，哈哈，我同報道中另一個人就熟。（鄧特希？）唔係，冇同佢他合作過，都唔同年代。」而展鵬口中的熟人應是波友，呂晶晶前男友林韋辰。

此外，同場出席派福袋活動的還有藝人邵美琪（Maggie）、滕麗名（阿滕）、林鈺洧、譚玉瑛、黃建東、謝高晉及陳綺明等。阿滕正忙於拍無綫新劇《模範律師團》，被問到拍攝了10年的處境劇《愛‧回家之開心速遞》日前收廠，她表示：「監製話未完嘅，劇集出晒街先叫做完，梗係唔捨得啦，不過唔緊要，我哋『熊家』人今晚約食飯，我最唔捨得係丹爺（劉丹），因為佢要抖，同埋嚟緊要做膝頭哥手術，但唔係有病 ，同埋佢呢啲半山人（住半山），我住鄉下 ，好難去半山撞到見佢：『阿仔』周嘉洛佢仲後生，只要我返公司就會見到佢，平時都會私下約見面，做運動，嘉洛都就開工，佢都幾乖仔，不過如果有個女，我都想要個女。」Maggie亦戥《愛》劇完結感可惜，她說：「我都未入嚟拍，（可以考慮加入另一處境劇《三代同糖》喎 ）我諗我要等到《四代同糖》先有得拍。」

阿滕又話今日凌晨3至4時才在深圳返到香港，雖然拍攝室內戲都沒有冷氣，但已好過留在室外，她說：「8月幾拍完，見番好多舊演員同事，導演都係以前啲導演，好開心， 好似舊生團聚咁，之後未有新工作安排。」

Maggie又謂兩人加入無綫數十年，但從未同劇合作，只是經常在化妝間相遇，加上性格相近而成為好友，希望將來有機會合作，但有指無綫愈來愈少劇開拍，她充滿信心：「會愈嚟愈多㗎啦，希望在明天，大家都傾梗㗎啦。」談及前無綫監製鄧特希被譚凱琪入稟申請破產而被揭和前亞姐呂晶晶已婚，Maggie表示：「我哋冇問人私事，有聽聞過佢結咗婚，但唔知同邊個，拍嘢唔會問人你結咗婚未，希望佢冇事。」

同場的亞姐陳綺明被問到可認識已故前亞姐劉月好，她說只聽過對方名字，但沒有太深記憶：「因為亞姐太多人參加，仲有唔不同地區嘅亞姐，曾試喺街度有靚女走嚟我面前，話佢自己都係亞姐，而且亞姐又停辦過幾屆，所以人哋唔記得我，我都唔介意。」

綺明近日忙於為藝人高爾夫球會、仁美清叙及與其他慈善團體合作慈善工作，指藝人高爾夫球會會長黎瑞恩患重感冒而缺席今日活動，但她十分感謝她對慈善的支持。另外，她正修讀AI課程，也有擔任助教，及代理韓國品牌護膚品生意，工作忙碌。