【警係個大佬】羅子溢否認被召鎮場 王敏奕撐拍短劇唔係降呢.無綫電視近日終於宣布開拍新劇《警係個大佬》（暫名），今日喺將軍澳電視城舉行開鏡拜神儀式，一眾演員包括羅子溢、王敏奕、林盛斌（Bob）、賴慰玲同傅嘉莉等都有現身。劇中飾演江湖大佬嘅Bob，因為意外變成植物人，靈魂出竅附身喺羅子溢身上，展開一段交錯靈魂嘅故事。

講到無綫近年好少推出純自家製劇集，問到羅子溢同王敏奕係咪被公司召番嚟「鎮場」，羅子溢就話演員比較被動，公司有工作就會盡力做好；王敏奕就話無論咩戲，作為演員都會做好本份。

今次係佢兩個繼《婚後事》同《家族榮耀之繼承者》之後第三次合作，羅子溢仲會一人分飾兩角，一個係自己，另一個係俾Bob靈魂附體嘅版本。佢話呢個係劇中嘅矛盾位，「究竟佢對我嘅好，嗰一刻係邊個嚟？」為咗演得神似，佢私底下同Bob研究咗好多，仲互相觀察對方嘅五官同表情。

雖然劇集設定好似幾荒誕，但兩個人都強調呢套唔係喜劇。王敏奕話劇本探討嘅係深層次嘅親情，「其實係挑戰緊人生乜嘢最重要。當你得返一次機會，可以做一件事嘅時候，你會揀做咩？係錢、名譽定地位？」

講到造型，羅子溢喺劇中做交通警察，問佢有冇着住制服影相俾仔女睇，佢搞笑話：「佢哋唔食飯時，應該會攞嚟嚇吓佢哋。」見到佢身形比之前大隻，佢就謙虛話係衫嘅設計效果，但都承認劇中有少量騷肌場面，「咁多屋企戲，冇乜可能唔使，例如着吓背心、沖吓涼都會。」

除咗拍劇，王敏奕今年仲有新搞作，就係準備出歌。佢透露呢個係籌備咗好耐嘅Side Project，目前進展順利，「做咗演員咁多年，自己又鍾意音樂，唔係話要講成功與否，純粹係一個興趣。」羅子溢聽到就笑住話自己都要爭取唱劇集主題曲。

講到將來有冇機會拍短劇，王敏奕就話一啲都唔介意，「我細個已經係拍微電影。依家美國、英國、台灣等好多地方都有唔同製作，冇Grade之分㗎啦。大家唔可以限於傳統，要與時並進。」

劇集監製林志華喺活動上都話，今次開拍除咗要多謝台前幕後嘅努力，亦都好多謝公司嘅支持，「大家記住，唔使多謝我，多謝公司！因為開到戲係因為公司嘅。好多謝公司今次俾機會我哋，令我哋可以一齊做個好戲俾大家睇。」

TVB