吳幸美結婚丨《東張西望》主持疑集體缺席婚禮惹揣測？網民爆笑熱議：個個咁索點敢請.《東張西望》主持吳幸美昨日（23日）公布與圈外老公Sammy嘅結婚喜訊，仲大方分享婚禮甜蜜照片，獲大批網民祝福。不過有網民發現，喺眾星雲集嘅婚宴上，唯獨唔見任何《東張西望》嘅同事，即時引發網上熱烈討論。

從吳幸美公開嘅婚照可見，到場祝賀嘅圈中人陣容鼎盛，包括李龍基、Joe Junior、方伊琪、譚玉瑛、安德尊、李思捷等眾多前輩同好友，星光熠熠。但最令人關注嘅係，同佢朝夕相對嘅《東張西望》主持團隊就集體「缺席」，令唔少網民好奇佢哋私下嘅關係係咪如外界所想咁融洽。

呢件事迅速成為網上熱話，有網民喺連登討論區紛紛留言猜測原因。有人話「同事啫，講唔上係朋友」、「可能關係唔多好」、「同事多數做唔到朋友」，覺得工作夥伴同私下交情唔可以混為一談。亦有網民抵死咁問：「請佢哋拍一集去播？」、「全部都去係咪要停一晚廠？」認為可能係為咗唔影響節目運作。更有留言笑稱，「東張個個咁索點敢請」，笑指吳幸美可能怕老公「變心」，仲開玩笑話可能係怕《東張西望》團隊嘅「正義」形象太強，擔心被「尋仇」，《東張西望》主持先唔敢聚埋一齊。

雖然婚宴上未見《東張西望》同事身影，但吳幸美喺IG報喜嘅貼文下面，其實獲得咗大量《東張西望》同事嘅祝福。包括梁麗翹、Patrick Sir（林溥來）、陳懿德、區永權、阮嘉敏等主持都有留言恭賀，可見佢哋之間交情依然良好，可能只係因為工作或其他原因未能親身到賀。此外，婚禮嘅另一焦點係證婚人由知名律師、前香港立法會議員謝偉俊（Paul）擔任，有網民好奇一對新人與謝偉俊嘅交情，亦有人認為可能只係單純邀請一位知名律師見證重要時刻。TVB