臥底嬌娃丨陳瀅透視睡衣Look索爆搶Fo 關曜儁戇直追女仔笑爆嘴 羅毓儀初吻戲引熱議🔥.TVB無綫電視熱播劇《臥底嬌娃》最新劇集話題滿滿，4日播出的一集裡，陳瀅以性感透視睡衣造型登場，大晒優越身材成功搶鏡，獲大批網民大讚索爆；同劇關曜儁飾演的「朱皮」憑戇直純情的忠粉人設搞笑出圈，深受觀眾喜愛，戲外的他更是三年抱三的顧家好男人；而5日播出的一集就播出羅毓儀與涂毓麟的經典強吻戲，劇情浪漫似韓劇引發熱議，羅毓儀受訪時直認拍攝時怕醜緊張，反而令演出更入戲，更大讚拍檔涂毓麟紳士有風度。

無綫熱播劇《臥底嬌娃》近期人氣高企，連續幾晚播出的劇集都爆出滿滿亮點，引來網民熱烈討論😆。4日播出的一集當中，最受矚目的莫過於沈佳琪（張曦雯飾）、江妙姿（陳瀅飾）、童小茹（羅毓儀飾）同寶儀（鍾柔美飾）四人齊齊開睡衣派對大講Girls Talk的戲份，其中陳瀅的造型更是全晚焦點，成功搶Fo。

劇情講到四人以睡衣派對為藉口，留在劉彪大宅過夜，各人都揀了心水睡衣上陣，當中張曦雯的造型已經大晒修長美腿，相當養眼✨。不過後來江妙姿為了引寶儀的保鑣中計，特意換上性感透視睡衣登場，大晒美腿同好身材，吸睛度直接爆燈！再加上她一個回眸一笑的鏡頭，難怪大批網民睇到心心眼，紛紛大讚陳瀅身材超正，完全被她迷倒。

除了女主角們的養眼戲份，同劇關曜儁飾演的「朱皮」都深得觀眾喜愛🤣。劇入面的他是個戇直純情男，單戀陳瀅飾演的江妙姿，同好兄弟潘奕風的對話經常笑料百出，更是江妙姿的頭號忠實粉絲，每次她有比賽都會到場舉牌應援，不停高呼「Miu I Love You」「你是最好的」，相當落力。

4日播出的一集入面，朱皮仲在家裡整了個妙姿的應援專區，興奮到又跳又叫「After Work」「Miu Miu」「江妙姿」，之後仲同奕風分享自己同妙姿一早結下的緣份——原來當年妙姿去二世推廣電話優惠，朱皮一見到自帶女神光的妙姿就一見鍾情，全程眼定定、一副天然呆的樣子望實對方，仲接話「我有興趣，有咩優惠？」，聽到妙姿講「送套」就即刻答「多謝晒」，整段名場面搞笑到不行。而戲內是戇直純情男的關曜儁，戲外同樣是名副其實的顧家好男人，他同圈外女友楊韻璇婚後三年抱三，除了演員本職之外，仲同友人合資開健身中心，生意越做越好，只為妻兒可以有舒適的居住環境。不少網民都話超鍾意朱皮呢個角色，每次佢出場都會笑到肚痛，仲留言話「朱皮真係超撐阿Miu」「佢真係誇張得來好得意」「佢對阿Miu同風哥一樣咁好」。

來到5日播出的一集，就迎來童小茹（羅毓儀飾）的回憶殺名場面💘。劇情講到童小茹在自助洗衣店遇到醉漢搗亂，幸得涂毓麟飾演的警察出手制伏，而小茹亦認出對方，就是當年奪走自己初吻的男生。小茹以為對方認不出自己，回家後全程心不在焉，回想起當年在蘭桂坊同朋友哭訴愛犬Cookie離世，傷心話「你叫我點樣開心，依家Cookie走咗，我冇得抱住佢，同佢散步，我依家個心好似穿咗個窿咁」，之後獨自離開的時候邊行邊喊，更不慎跌倒在地，相當慘慘豬。

就在呢個時候，涂毓麟突然出現扶佢起身，溫柔問「你痛唔痛？」，仲一臉情深望住佢，不單輕輕抹去小茹臉上的淚水，更突然強吻佢，令小茹當場嚇親，即刻推開對方仲摑了佢一巴。呢場強吻戲播出之後，不少觀眾都話畫面超浪漫，好有韓劇嘅感覺，紛紛留言話想知道兩人之後的劇情發展，仲有人笑住話「Oscar好靚仔呀！」「其實突然被人強吻真係好驚，好彩對方係靚仔」「Kris睇到會唔會嬲呀？」。

談到呢場咀嘴戲的拍攝過程，羅毓儀接受tvb官网獨家訪問時直認，一開始拍攝的時候相當緊張尷尬，「但我哋都係專業嘅演員，好快就投入咗個角色，因為呢場戲係講我突然畀佢強吻，所以反而呢啲怕醜、緊張嘅感覺，令我更加入戲」。她仲大讚拍檔涂毓麟為人好有風度，全程好照顧她的感受，「我哋拍呢場戲之前有好好溝通點樣做，而且呢場咀嘴戲係後期先拍，前期拍攝嘅時候我哋已經相處過一段時間，所以拍攝嘅時候都會順手好多」。TVB