「蔥頭」丘梓謙宣布同麥皓兒分手

現年32歲、細個就做童星的丘梓謙，近年憑住《愛·回家之開心速遞》入面飾演「蔥頭」一角成功入屋。其實佢演出經驗都幾豐富，由2004年開始就已經參演過唔少劇集，好似《心花放》《布衣神相》《人間蒸發》同《秀才遇著兵》等等，後來因為升學暫別幕前，到2014年畢業之後報讀藝訓班，再返嚟電視圈發展。

丘梓謙同麥皓兒呢段超過10年嘅姊弟戀，今日（5號）傳出正式玩完。雖然早年佢都有唔少演出機會，但多數係閒角，直到2019年播嘅《十二傳說》入面飾演殺人犯先備受關注。多年嚟佢都大方承認戀情，原來未入行之前，已經同2007年落選港姐麥皓兒拍拖，雖然曾經有結婚計劃，不過今日兩人就齊齊喺IG限時動態發文，並互相tag對方：「一年前我哋經過坦誠溝通之後，已經轉換咗彼此嘅相處模式，我哋係彼此嘅摯友，好好嘅工作拍檔，祝願彼此一切順利！」

丘梓謙以前都講過，同大佢6歲嘅麥皓兒相處得好舒服：「其實女友有小朋友一面、又有成熟一面，大家會經常傾偈，好多嘢佢都會提點我。佢最吸引我嘅地方係肯講真心話，唔會收埋自己，我最驚要估另一半諗乜，如果有唔開心，寧願講出嚟解決。」

佢仲提到過，兩個人曾經有結婚打算，不過暫時都係以事業為重。

至於麥皓兒，由細到大都好鍾意參加比賽，攞過普通話朗誦比賽全港總冠軍、香港傑出中學生、香港傑出少年，16歲更加成為18區歌唱比賽亞軍，一度被封「天生比賽狂」。不過佢18歲嗰陣毅然放棄升學，走去參加選美入娛樂圈，除咗拍劇，仲被安排做《東張西望》主播。直到24歲突然決定做全職學生，停工留港讀書，報讀英國伯明翰大學商業管理學士，最後以一級榮譽畢業。可惜返嚟之後，戲路變成多數演師奶角色。