戴祖儀自爆遭圈中男藝人纏擾兩年 直擊對方突上門驚險經歷
「宅男女神」戴祖儀早前喺網上節目大爆入行以來最不安嘅經歷，話過去兩年一直被一名圈中男藝人瘋狂追求同騷擾，形容對方行為好危險、好恐怖，令佢身心都好大困擾。
戴祖儀話，呢位男藝人本來只係透過朋友飯局認識嘅雀友，最初只係普通同事，樣貌普通，佢完全冇諗過同對方發展。直到一次聚會之後，男方突然表白，想將關係升級，戴祖儀當場好愕然，即時拒絕話兩人冇可能，叫對方唔好浪費時間，以為講清楚就會完結。
戴祖儀今日（5/3）現身葵涌為音樂劇《我們的青春日誌》宣傳，受訪時重申自己好早就封鎖對方聯絡渠道，做人好乾脆，冇可能就唔會畀任何希望，亦希望對方識得放棄。
佢強調對方並唔係TVB同事，又爆對方曾經不請自來，突然出現喺朋友聚會地方，仲試過按門鐘上門，佢以為係外賣，開門先發現係對方，當場嚇呆。戴祖儀話當時並冇爭執，只係請對方離開，覺得呢種行為唔尊重在場人士亦唔尊重自己，希望對方可以諗通。TVB
