臥底嬌娃｜鍾柔美挑戰高難度輪椅舞🤸♀️ 親爆最擔心呢樣嘢.TVB熱播劇《臥底嬌娃》最新劇情中，鍾柔美飾演的寶儀因腳傷坐輪椅上陣，大跳高難度輪椅舞驚艷觀眾。她受訪時坦言，呢段表演練足兩星期，極考手力腰力，結尾的傾斜動作更令佢一度十分擔心，同時大讚拍檔陳瀅夠大力，給足滿滿安全感。

無綫劇集《臥底嬌娃》現正熱播，3月3日播出的一集入面，由鍾柔美飾演的寶儀，與張曦雯飾演的沈佳琪、陳瀅飾演的江妙姿、羅毓儀飾演的童小茹一齊參加《超星女團》總決賽。劇中寶儀因腳傷要坐輪椅上陣，在台上大跳輪椅舞，畫面所見，鍾柔美整個表演灑脫自如、動作流暢，結尾更完成連人帶輪椅45度傾斜靠向陳瀅的高難度ending動作，絕對係力的表現，大考手力同腰力，表現相當亮眼。

鍾柔美接受tvb.com獨家訪問時坦言，呢段輪椅舞對自己而言挑戰好大：「我前前後後學咗約兩個星期，其中有個位要拎起輪椅跳兩下，要運用手力同腰力，真係有難度，所以綵排嘅時候隻手好容易酸痛。」

佢仲提到，結尾的傾斜動作一開始令佢十分害怕：「因為我要將成個重心挨落陳瀅度，我好擔心自己好重，或者坐唔穩、做得唔啱個動作。好多謝排舞老師教得我哋好好，示範咗好多次，冇諗過最終出嚟嘅效果好OK。仲有陳瀅真係好大力，嗰刻真係覺得佢好man。」

TVB