炎明熹專訪｜原本志願做護士卻踏上歌手路🎤 坦言唱歌不敢豁出去：怕出錯寧願收收埋埋

🎤炎明熹（Gigi）接受專訪，坦露入行以來的完整心路歷程。原本志願跟隨媽媽腳步做護士的她，因命運安排憑《聲夢傳奇》踏上歌手路，向來敢於接受挑戰的她，唯獨面對唱歌時總是不敢豁出去，就算家人勸喻「寧願你走音，都唔想你收收埋埋唔出全力」，仍因怕出錯而有所保留。訪問中仲分享了自己的性格轉變、成長背景、入行後的壓力與迷茫，以及開工作室做老闆後的點滴，真誠剖白內心的掙扎與成長。

炎明熹於訪問一開首就坦言，覺得自己非常幸運，由未出道到而家，身邊的長輩、朋友、老師都好錫自己，雖然呢個世界唔會所有人都鍾意你，但唔鍾意自己的人始終偏少，所以一直都好感恩。

被稱為「火星女孩」的Gigi，14歲就開始參加各大小歌唱比賽，雖然早已見慣大場面，但早年仍未能做到對答如流，加上思維跳脫、有時天馬行空，先有呢個花名。佢憶述，年幼時性格相當活潑，遇到想玩的事物，會主動同人表達自己的想法，不過去到12歲左右，性格就開始有轉變，越來越容易怕醜。佢笑言，可能人越大，就會越在意自己的行為會唔會惹人討厭，加上自己一冇表情、唔笑的時候，就會被人解讀為黑臉、冷酷、難相處，所以佢會盡最大努力向身邊人釋放善意，唔想大家誤會自己，其實內心好想同大家玩、同大家傾計。佢仲自嘲，自己本身氣血差、手腳冰凍，唔化妝尤其唔塗唇膏的時候，成個臉冇血色，仲會俾人覺得好柔弱、好似下一秒就要暈低，屋企人成日煲紅棗水俾佢飲都冇乜用，仲怕呢個樣會俾人更有距離感。

講起改變人生軌跡的《聲夢傳奇》比賽，Gigi坦言參賽初期好唔習慣，因為以往參加的比賽，通常一日就完成，最長都只係海選、複選、決賽分幾日，從未試過一個比賽要持續半年，仲要上電視唱歌俾全香港觀眾睇，新鮮感之餘，亦都帶嚟好大壓力。佢憶述，比賽分幾個階段，一開始大家仲未認識自己的時候，真係初生牛犢不怕虎，去到後來電視出街、越來越多人關注自己，反而變得好怕。最令佢意想不到的是，比賽到尾段，自己已經踏上歌手路，備受關注反而令佢有啲唔自在：「我好感謝大家留意我、鍾意我，但我一開始只係諗住參完比賽就算，冇諗過會真係行歌手呢條路，因為我本身想同媽媽一樣做護士，呢個真係命運的安排。」

向來喜歡接受挑戰、做其他事都敢豁出去的Gigi，唯獨面對唱歌，總是有所保留、唔敢放開。佢坦言，屋企人成日同佢講「寧願你走音，都好過你成日收收埋埋、唔出盡全力」，但自己始終放不開，最怕就是出錯：「我怕啲影片會一直流傳落去，成日會反覆諗，如果我走音一兩次，大家慢慢就會唔理我；但身邊人又話，你成日唔出盡力，買飛入場的觀眾睇一兩次，就唔會再睇你。呢個擔心出錯的心態，由我出道到而家都一直存在。」

講起成長背景，Gigi透露自己喺香港出生，父母同弟弟妹妹一直喺內地居住，細個由四姑媽照顧，去到12歲開始學唱歌，就轉為同五姑媽一家同住，呢幾年陪住佢參加各大小比賽的，亦都係五姑媽。過去有一段日子，佢因為續約風波導致工作量歸零，曾經陷入迷茫，尤其睇返自己社交平台的唱歌片段，會不停自我否定，嫌棄自己唱得唔夠好，成日有把聲音打沉自己，質疑自己究竟適唔適合做歌手，幸好有身邊人不停鼓勵，仲有粉絲一路陪伴。佢憶述，去年平安夜舉行的音樂會，安可環節喊到幾乎唱唔落去：「其實最主要係想同粉絲用音樂見面，出場前音樂總監係耳機度同我講，佢哋千里迢迢嚟到亞博支持你，仲未走，仲係度等你，你要加油。當時換緊衫仲冇乜感覺，點知一上台，配合歌詞同大家的支持，眼淚一下子就湧出嚟。」

講到身邊最親的朋友，Gigi話有兩個由未出道就認識的好朋友，係自己專屬的「訴心事樹洞」。雖然而家大家都要讀書，好難約時間見面，線上都唔會成日傾計，但一見面就會有講唔完的說話。佢坦言，以自己的性格，好難再認識新的知心朋友，呢兩個好友就係自己人生金字塔入面最頂層的兩個人，而家大學認識的朋友，總會有少少怕，唔知對方會用咩眼光睇自己，會唔會同自己有距離，所以永遠都會先釋放最大的善意，就怕俾人覺得自己冷淡。

而家開咗個人工作室、榮升老闆的Gigi，完全冇架子，從來唔會擺老闆款，仲會將自己當成員工一齊做，堅持「輕鬆嘅時候就輕鬆，要做事嘅時候就要做事」。不過佢就自嘲，自己做決策有時會三心兩意，決定大事唔會易反悔，但係揀相呢啲小事，明明昨日揀好咗，第二日睇又覺得要換，反反覆覆，仲話如果自己係同事，都會覺得自己好麻煩，所以呢個同說話表達方式，都係自己而家想重點改善的地方。佢仲笑言，自己人生到而家只發過兩次大脾氣，一次係為咗演戲，唔算數；另一次係以前住深圳屋企，叫弟弟妹妹一齊幫手收衣服、分工合作，點知佢哋只顧住玩，當時越諗越嬲，又覺得佢哋年紀細唔應該太嚴厲，最後冇鬧人，只係將自己鎖入房間發悶脾氣。

一直對當初冇做護士有少少遺憾的Gigi，後來被音樂劇的朋友一句話點醒：「其實你做音樂都可以做到護士嘅作用，都可以幫到人。」呢句話一下就解開咗佢的心結，令佢明白，就算唔做護士，都可以用音樂做大家的榜樣、照顧到大家的感受。面對以往網民嘲諷佢打扮過分成熟、16歲就有30歲樣貌，佢仲高情商回覆：「我希望我30歲都可以保持呢個樣子。」而家無論係髮型、服飾定歌曲方向，Gigi都有全盤決策權，告別舊篇章，歌唱事業重新出發。

至於日常生活，Gigi就笑言自己大部分時間都處於「一條直線」的單調狀態，反而唱歌的時候先會代入多啲情緒：「入鬼屋唔會叫，只會緊張；坐過山車都唔會叫，反而覺得好舒服，就算叫我喊出嚟會舒服啲，都只會硬繃繃喊兩聲。試過同音樂劇團隊係路邊等車，其他女士見到蟑螂尖叫四散，我都係企喺原地冇反應。」佢笑言，都好想自己的人生可以多啲激情，十載光陰過去，自己的人生故事先啱啱開始，前路漫漫，仍有好多可能性。