专访丨陳瀅捱義氣執二攤頂演《臥底嬌娃》 跳唱打戲驚喜發掘打女潛質.由陳瀅、張曦雯、羅毓儀同馬貫東主演的無綫劇集《臥底嬌娃》現正熱播，陳瀅今次飾演的「江妙姿」怕醜內斂，同本人外向大咧咧的性格反差極大，仲要挑戰女團跳唱同動作戲，堪稱演技考牌之作。而鮮為人知的是，呢個角色一開始另有原定人選，全靠陳瀅臨危受命捨義氣頂上執二攤，先至順利開拍。

陳瀅日前接受本報專訪時坦言，自己係全劇最遲入組的一位，當日接到監製來電，就連曾勵珍（珍姐）都在場，開口就問佢未來兩個禮拜有冇行程安排，隨即就叫佢入組頂演，完全冇預留時間做準備，因此拍攝初期相當擔心表現。佢仲大爆，今次飾演的「江妙姿」原本定咗另一位女演員出演，受訪之初佢唔肯透露對方身份，只表示完全唔介意執二攤，皆因對方係自己的好朋友。

其後《臥》劇監製方駿釗接受訪問時，就證實辭演的女演員正係賴慰玲。方駿釗透露，一早已經搵賴慰玲試鏡，當年《降魔的》兩輯系列入面，賴慰玲飾演謝雪心的後生版、馬國明媽媽一角，就算只得幾場戲都發揮得相當出色，因此一直想同佢再合作。點知開工前約3星期，佢想同賴慰玲傾角色同劇本古仔時，對方卻欲言又止，約定直接上公司面談，最終以私人理由（懷孕）提出辭演。

「當時得番3個星期就開工，真係非常之急，而且無論搵邊個頂上，每個藝人都會覺得自己係執二攤，所以我一定要搵一個關係好好、我十足信任嘅演員幫手，即刻就打咗俾陳瀅，如實同佢講晒成件事的來龍去脈，佢真係非常有義氣，一口就應承咗，真係好多謝佢。」方駿釗坦言，自己同陳瀅已經合作過3次，默契十足，而已經離開無綫的佢，亦直言今次冇辦法同賴慰玲合作有少少可惜，未知日後仲有冇機會再合作。

至於辭演的賴慰玲，就回覆表示：「本來覺得好遺憾，但知道係陳瀅接演就好開心，我哋之前都有傾過呢個角色，依家出街效果見到佢真係做得好好，好戥佢開心！」

臨危受命的陳瀅，為咗拿捏好呢個角色落足功夫，佢形容今次的演出係「表演上的表演」，難度極高，皆因「江妙姿」性格文靜怕醜、存在感極低，同現實中說話大聲、朋友眾多的自己反差極大，對演技考驗十足。

而《臥》劇前晚播出的一集入面，陳瀅、張曦雯同羅毓儀分別以露腰搖滾風同校園風造型上陣跳唱，陳瀅仲大晒功夫舞，踢腿踢出新高度，意外畀觀眾發掘到佢的打女潛質，驚喜十足。

講到今次《臥底嬌娃》係馬貫東首部擔正男一的劇集，陳瀅就大爆拍攝趣事：「佢同我之前合作過嘅男演員好唔同，成日唔記得對白，仲成日講錯晒啲名，一到要拍案件戲，我就知實要OT啦！哈哈，最後變咗片場嘅固定笑話，我哋成日都好享受取笑佢。」佢仲透露，有一場對打戲，被馬貫東起飛腳整跌受傷，膝頭仲留咗永久疤痕，最後要對方答應一世幫佢兩隻愛犬免費洗澡，先至肯作罷。

向來以演戲為主的陳瀅，將於今年4月首度夥拍同門的蔡潔，到澳門舉行首個音樂會《Pillow Talk》。佢直言，如果唔係今次《臥》劇入面演過跳唱女團，應該唔會接呢個演出：「今次呢個角色，畀觀眾見到跳唱嘅陳瀅，時間上真係好夾。如果突然叫我開騷，我覺得唔太啱，好怕做同自己形象太唔一樣嘅嘢，觀眾未必接受到我突然唱歌。依家就好舒服，覺得係上天安排咗我去唱歌。」

陳瀅仲自爆，去年犯太歲，同電影相關的大項目最終功虧一簣，亦令佢領悟到有些事毋須強求，相信上天係想讓佢先做好跳唱呢件事，下半年再衝刺其他項目。另外，以往陳瀅經常被網民批評「時裝車禍」，佢就打趣話：「如果我高10厘米，或者再瘦10磅，應該會靚啲。」而去年堅持做運動減磅的佢，就笑言最近似乎再冇網民批評佢穿衣唔夠靚了。

TVB