滕麗名挑戰4小時獨撐帶貨直播 呂慧儀團圓飯冇張景淳份 湯盈盈認與林曉培撞樣.元宵佳節正日，TVB長壽處境劇《愛·回家之開心速遞》一班核心演員滕麗名、呂慧儀、湯盈盈，楊明、莊思明等藝員，今日（3日）齊集將軍澳電視城出席節日主題活動，與現場觀眾猜燈謎、互動送暖，熱熱鬧鬧慶祝元宵。活動現場三位人氣女星大談節日安排與近況，互相爆料笑料百出，更首度回應近期網上熱話。

---

【滕麗名：老公外遊獨闖廣州帶貨 挑戰4個鐘唔走開 自認TVB訓練出身夠Talk得】記者：阿滕，聽聞你今日活動完就要趕去廣州做直播帶貨，第一次一個人挑戰全場，心情緊唔緊張？滕麗名：緊張都有少少嘅，我老公去咗旅行，所以今日全情寄託喺工作度，仲要帶定飯上去，驚自己一個人頂唔順。今次係第一次一個人做全場直播，要一口氣講足4個鐘，真係好大挑戰！記者：大家都知你向來好Talk得，今次有冇特別做準備？滕麗名：準備就係而家唔講咁多嘢，留返啲氣力夜晚用！我同自己講，直播期間儘量唔飲水、唔食嘢、唔去廁所，盡量都唔好走開崗位。以前做過直播，我全程都冇走開過，人哋主播都有離開過，我就堅持唔走，我得嘅！始終我哋TVB訓練出來嘅嘛，以前拍古裝劇，開工成日都唔使去廁所㗎！記者：帶貨要講普通話，你對自己嘅普通話有冇信心？滕麗名：我嘅普通話？好普通啊，超級普通！講真，身邊人裏面普通話最好嘅係金城安（周嘉洛）啊，你哋都估唔到掛？佢而家返咗大陸，同美儀姐（江美儀）拍飲食節目，忙到冇時間，唔係我都捉埋佢一齊做直播啦！記者：之前《尋秦記》電影反應好好，係咪帶挈你多咗好多工作機會？滕麗名：其實帶貨都係公司安排嘅工作，不過工作量的確係多咗，外拍機會都多咗，呢樣真係要多謝古老闆（古天樂）！最搞笑係，好多人話我而家個樣同20年前拍《尋秦記》嘅時候冇分別，仲真係有美容品牌搵上門，唔係講笑㗎！

---

【湯盈盈：食呂慧儀湯圓先知元宵係情人節 認與林曉培撞樣 大讚對方保養有功】記者：盈盈，今日元宵佳節，有冇同屋企人慶祝？湯盈盈：我今日早餐已經食咗阿蟹（呂慧儀）整嘅芝麻湯圓啦！講出來你哋都唔信，我今日先知道原來元宵節係中國情人節，以前淨係知道2月14日，真係嚇一跳！今晚返屋企要好好招呼我老公錢嘉樂先得！記者：最近台灣歌手林曉培宣佈來港開演唱會，網上好多人話佢張海報同你餅印一樣，你有冇睇到？湯盈盈：有啊有啊！我睇到張相喇！其實好耐之前已經有人話我同佢生得好似，估唔到過咗咁多年，仲可以繼續撞樣！真係要讚佢保養得太好，keep得咁後生，淨係睇個頭真係一模一樣！佢身形仲正過我添，不過我都好可愛㗎嘛！記者：咁會唔會去睇佢演唱會？湯盈盈：我超鍾意睇演唱會㗎！我已經同佢哋講，遲啲一齊去睇！我仲懷疑佢遲啲會邀請我做嘉賓添，如果真係，我一定帶埋呢班姊妹一齊去，到時兩個人行出嚟，簡直就係Twins啊！

---

【呂慧儀：元宵團圓飯淨陪父母同仔仔 冇張景淳份 新一年要同仔仔一齊增值】記者：阿蟹，今日元宵要開工，收工之後有咩節目？呂慧儀：今日同盈盈一齊開工，收工返去就同我個蟹仔（兒子）食飯，仲有我阿爸阿媽一齊，一家三口溫温馨馨過節。記者：咁張景淳會唔會一齊食飯？呂慧儀：（笑）我淨係同阿爸阿媽同仔仔食飯啊，仲想趁呢個節日，教下兩個老人家相處得Sweet啲，佢哋呢輩人唔太識得表達甜蜜，我仲叫佢哋兩個閒時互相攬下錫下，好似我同仔仔咁。記者：新年假期有冇帶仔仔去邊度玩？呂慧儀：新年帶咗佢返內地鄉下探阿太，仲見咗好多好少見嘅親戚，最開心係仲可以玩煙花，仔仔興奮到不得了。其實佢有問我可唔可以去旅行，不過我覺得年假始終要同屋企人團年先最溫馨，旅行就等暑假先去都遲。記者：新一年有冇咩新計劃？會唔會再進修增值自己？呂慧儀：都有睇緊課程，只係仲未搵到啱我而家時間嘅。其實我最驚係同仔仔冇共同話題，佢而家成日逼我玩Roblox，我完全唔識郁，所以無論係讀書定打機，我都要大概知道佢嘅世界入面緊係講緊咩，同佢一齊學習、一齊成長。玩就認真玩，讀書就認真讀書，同仔仔一齊增值，就係我今年最大嘅目標。

TVB