楊明元宵再放話馬年拉埋天窗 莊思明當場拆台：呢句說話你哋都聽咗好多次啦.元宵佳節，TVB長壽處境劇《愛·回家之開心速遞》一眾藝人齊集將軍澳電視城，出席「歡樂慶元宵」活動，劉丹、滕麗名、呂慧儀、湯盈盈、楊明、莊思明、古佩玲、邵初、陳浚霆、歐瑞偉等悉數亮相，現場齊玩猜燈謎，氣氛熱鬧非常。當中拍拖多年的楊明與莊思明，全程成為全場焦點，被在場眾人輪住催婚，紛紛盼二人今年終於開花結果。

面對鋪天蓋地的催婚聲，楊明受訪時笑言：「今年都畀人問咗好多次，我都諗住盡快㗎喇，又唔使話太急，希望今年啦，馬年係好年吖嘛。」話音未落，身旁的莊思明即時笑住拆台：「佢年年都話今年㗎啦，你哋都聽咗好多次㗎啦？」

講到婚禮進度，楊明笑稱目前十劃都只係得番一點，要一步一步慢慢來，更自嘲年紀都唔細，係時候定落下來。被問到是否已經成功求婚？楊明即時O晒嘴，連聲話要逐步來，要好好計劃，準備一場充滿驚喜的婚禮。至於莊思明可有被屋企人催婚？她就表示：「屋企人反而冇，佢哋都適應咗啦，反而係身邊朋友催得仲緊。」楊明就補充，長輩們反而相當開通，提議二人不如旅行結婚就算，但自己就希望辦一場體面的婚禮：「又唔係話要大搞特搞，但係香港同馬來西亞兩邊都一定要安排到。」

講到元宵佳節的慶祝計劃，二人就表示，新年期間加上兩人生日日子相近，近期不停周圍拜年同慶生，玩到有啲攰，所以元宵節會留喺屋企食湯圓，好好休息。

同場的滕麗名、呂慧儀、湯盈盈三人，亦分享了元宵佳節的安排。湯盈盈笑言，今日一早已經食咗呂慧儀帶回來的湯圓，收工返屋企就要好好招呼老公錢嘉樂。

而滕麗名就相當忙碌，活動完結之後就要馬不停蹄趕去廣州做直播帶貨，今次更是要自己一個人單打獨鬥，講足4個鐘。被問到會唔會為咗避免去廁所，直播期間不吃不喝？滕麗名即時笑住大爆：「我哋TVB訓練出嚟㗎嘛，以前着古裝拍劇都唔使去廁所㗎啦。」提到早前電影《尋秦記》上映之後，是否帶來更多工作機會？滕麗名就表示自己一直都有做帶貨工作，電影出街之後，的確多了好多美容相關的邀約，皆因大家都覺得她20年來樣貌幾乎冇變過，保養得相當好。

至於呂慧儀，被問到元宵佳節會唔會同傳出緋聞多時的張景淳約會食飯慶祝？她即時耍手擰頭：「冇喎，收工就返去同蟹籽撐枱腳啦。」她又分享，新年期間專程帶住兒子返福建家鄉探長輩，仲可以放煙花，仔仔玩得相當開心。

而湯盈盈就被問到，有網民指她同即將來港開演唱會的林曉培撞樣？她即時笑住回應：「好耐之前已經有人話我哋似樣，估唔到佢而家都仲保持得咁後生，不過佢身形就正過我好多啦，哈哈。」

TVB