林盛斌Bob回應“台慶頒獎禮整爛獎系為見報” 林盛斌Bob早前於TVB《萬千星輝頒獎典禮》首奪「最佳男主持」獎項，於台上興奮激動發言時不慎弄壞獎座，引起一片嘩然。不過，隨後有不少網民認為Bob故意為製造話題，鄧兆尊及吳家樂亦於網上節目討論事件，認為Bob預先知道當時獎座並非真實獎座，因此故意為之望搏見報。昨日，Bob出席活動時亦回應時件，還原當時情況外更直言「高估咗我智慧」。足本訪問內容：问：收到實體獎了嗎？答：我還未收到，我都在追進度。其實這兩個星期很多朋友都問我幾時攞到獎，我都在等，因為獎座已經交回大會處理。大會同我講，可能會重新製作一個新的、更漂亮的實體獎項給我。问：電視播出後，網民質疑你是否刻意整爛獎座製造話題，你點樣回應？答：首先多謝大家咁多猜測，但我覺得大家真係高估咗我嘅智慧，我未去到咁聰明會設計呢啲事情。當時純粹太開心、太激動，上台腦袋一片空白，想大聲講多謝，一用力拍落張枱，結果就爛咗。連我自己都即刻心諗「死火喇」，會唔會好大件事。问：你點睇件事最後變成笑料？答：其實我覺得好幸運，一個無心嘅烏龍事件，反而令大家笑一笑、開心咗。作為最佳主持，其實都係希望帶歡樂畀大家，連攞獎都可以帶到一點歡樂，我覺得都幾應景。问：吳家樂同鄧兆尊提到你應該知道獎座之後會補發實體，你是否早有預計？答：我真係唔知道。不過都好多謝佢哋有留意我，但我都係嗰句，佢哋真係高估咗我。我唔係蠢，但亦未聰明到會設計呢啲橋段去搶焦點。喺咁莊嚴、隆重嘅場合，下面又咁多老闆、大哥，其實人會好緊張，嗰一下真係太興奮、太用力，完全無任何意圖去整爛個獎。问：之前有片段見到山聰咬你屁股，係咪真係發生？答：嗰啲其實係NG片段，嚟自我同山聰、維偉、五姑娘喺馬來西亞拍嘅一套賀歲片。套戲係喜劇，講媽媽再婚，我哋幾個去阻止。去到尾段拍咗好多瘋狂場面，包括脫我褲、打我屁股、咬我屁股，本來應該剪走，但效果出嚟真係好搞笑。问：被咬之後有冇事？答：山聰冇事，我就有事啫，我屁股瘀咗。不過整體拍得好開心，呢套戲我自己都好鍾意。问：對套馬來西亞賀歲片的成績有信心嗎？答：我見到唔少網民同馬來西亞電影KOL都對套戲期望值幾高，希望有機會衝入當地賀歲片票房三甲。亦有內地同香港朋友問幾時可以睇，可能之後會透過網絡平台同大家見面。问：陳庭欣（Toby）近況如何？你會幫佢介紹男朋友嗎？答：前兩日先見過佢，我同佢講畀我啲時間，真係想幫佢留意啲好男仔。我知道佢嘅條件，例如要鍾意小動物、小鳥、孝順父母、身高差唔多。我認識佢好多年，覺得佢係一個好好嘅女仔，獨立、有能力，所以都想幫佢。问：對女兒越穿越性感，你會唔會擔心或管束？答：其實好難管咁多，只要唔係做壞事、犯法嘅事，我都覺得OK。十七、十八歲嘅女仔，鍾意打扮、著得靚啲，覺得自己性感少少，同朋友出街，我覺得唔係咩大件事。问：會唔會擔心佢被人過度關注？答：我有提醒過佢，放咗出嚟嘅嘢可能會畀人保存好耐，將來隨時再拎出嚟講，所以要有心理準備。呢兩三年佢已經學識點樣小心啲，無論講嘢定同人互動，其實我同佢都一齊學習面對。问：她會去夜場嗎？你會唔會反對？答：佢冇去到夜場，通常係去朋友嘅派對室，或者聯校活動，未去到蘭桂坊夜蒲、飲到醉。我同太太都覺得，只要佢會交代行蹤、定時返屋企，就可以接受。问：她拍拖你介唔介意？答：而家暫時都係單身，我知道有男仔約過佢，但未發展成戀情。作為爸爸我都比較開放，佢咁大個，知道自己想做咩就可以。將來如果讀演藝學院，排戲有感情交流，呢啲都控制唔到，只要佢開心就得。TVB