譚詠麟為巡唱澳門站綵排 難忘惠州3萬歌迷冒雨支持
譚詠麟（校長）《經典傳奇巡迴演唱會》最終一站將於12月12及14日晚於澳門威尼斯人綜藝館舉行，門票現已公開發售。由於香港未有檔期再舉行此演唱會，意味這個主題的演唱會在澳門將是最後一次，日前校長在香港為演唱會進行綵排，大唱《卡拉永遠OK》等經典金曲。談到來到澳門最終站，校長感受特別深，因為自2015年《銀河歲月40載》開始，再到《經典傳奇》，已連續10年舉行巡迴演唱會，到多個城巿跟歌迷聚會，更驚訝歌迷層面極之闊，「佢哋話叫『懷疑爸爸，了解爸爸，然後成為爸爸』，呢句話點解呢？就係懷疑爸爸點解會咁鍾意譚詠麟，跟住去了解爸爸學聽爸爸聽嘅歌，聽到啲歌咁好聽，於是變成同爸爸一樣嘅喜好！」
譚詠麟預告澳門站內容有不同
每站巡迴演唱會，校長坦承去到尾聲都會很不捨，尤其是encore部分，歌迷忘情投入度，無論精神上與實際上的付出都不少，「每個舉動都係代表支持，深深感激佢哋咁多年嚟嘅支持，真係非常之入心。」因歌迷表現令校長太感動，到encore時都會撐不住唱落去，「真係唱唔到落去，因為會變晒聲，控制唔到，連個key都捉唔住，所以有時候係佢哋唱畀我聽。」當中9月舉行的惠州站，獲3萬位歌迷冒着風雨在台下支持，更令校長難忘，「落雨落到好大，雖然有啲人着咗雨衣，但係有啲都係冇着雨衣，大家喺度淋住雨睇騷，我梗係唔可以縮埋一邊唱歌，唯有同佢哋一齊淋，所以見到個畫面係『淋漓盡致』。」校長又預告每一站演出，都會因應當地民情在內容上作調整，澳門站亦不會例外，但就大賣關子，「預告唔到咁多，變動一定會變，希望大家睇得開心啦！」還提醒歌迷記得要準時入場，因娛樂場所對時間上有一定限制，「早啲入場可以聽足啲，同埋喺現場記得有咁投入就咁投入，同我一齊大合唱，唱爆個館。」
